6 ມາດຕະການທີ່ພວກເຮົາຕ້ອງປະຕິບັດເພື່ອປ້ອງກັນຕົນເອງ

6 ມາດຕະການທີ່ພວກເຮົາຕ້ອງປະຕິບັດເພື່ອປ້ອງກັນຕົນເອງ

ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວໃນພິທີຖະແຫຼງຂ່າວປະຈຳວັນຂອງຄະນະສະເພາະກິດ ໃນວັນທີ 23 ທັນວາ 2021 ນີ້ວ່າ:

ປະຈຸບັນການລະບາດຂອງໂຄວິດ-19 ໃນປະເທດ ສປປ ລາວ ຂອງພວກເຮົາກໍ່ຍັງມີລາຍງານການຕິດເຊື້ອສູງຢູ່ ຄືສະເລ່ຍ 1.000 ຄົນ ຕໍ່ວັນ, ກໍ່ຍັງສູງກ່ວາຄ່າສະເລ່ຍຕິດເຊື້ອຂອງໃນໄລຍະ 7 ວັນຄືສູງກ່ວາ 500 ກໍລະນີຕໍ່ວັນ. ນະຄອນຫຼວງວຽງຈັນ ກໍ່ຄືຫຼາຍໆນະຄອນ ແລະ ແຂວງຈຳນວນໜຶ່ງເຊັ່ນ: ຫຼວງພະບາງ, ບໍ່ແກ້ວ, ຫຼວງນ້ຳທາ, ອຸດົມໄຊ ແລະ ແຂວງວຽງຈັນ ຍັງມີລາຍງານຕົວເລກລາຍວັນສູງ.

ຄຽງຄູ່ກັນນັ້ນສະພາບການລະບາດທົ່ວໂລກແມ່ນຍັງມີທ່າອ່ຽງສູງຂື້ນໃນຫຼາຍປະເທດໃນທະວີບອາເມລິກາ ແລະ ຢູໂຣບ ເນື່ອງຈາກສາຍພັນໂອມິກຣອນ ຊຶ່ງເຮັດໃຫ້ລັດຖະບານຫຼາຍປະເທດ ອອກມາປະກາດບາງມາດຕະການທີ່ເຂັ້ມງວດຄືນ ເພື່ອສະກັດກັ້ນການລະບາດໃນຄັ້ງນີ້ ແລະ ອີກບໍ່ດົນວັນສົ່ງທ້າຍປີເກົ່າ ແລະ ຕ້ອນຮັບປີໃໝ່ສາກົນ ກໍ່ຄືເທດສະການສຳຄັນທາງສາດສະໜາກໍ່ຍັບເຂົ້າມາ.

ດັ່ງນັ້ນ,ຂ້າພະເຈົ້າຂໍແນະນຳ 6 ມາດຕະການທີ່ພວກເຮົາຕ້ອງປະຕິບັດເພື່ອປ້ອງກັນຕົນເອງ

1. ໃຫ້ຮີບຮ້ອນໄປສັກວັກຊີນ ຖ້າທ່ານບ່ທັນໄດ້ສັກເທື່ອ ຫຼື ຕາມການປະກາດຂອງຄະນະສະເພາະກິດ ໃຫ້ໄປສັກເຂັມ3 ເພາະເຮົາຮູ້ແລ້ວວ່າວັກຊີນສາມາດຫຼຸດຜ່ອນຄວາມຮຸນແຮງ ແລະ ເສຍຊີວິດໄດ້.

2. ໃສ່ຜ້າຜິດປາກເໝືອນໄດ້ແນະນຳທຸກຄັ້ງ ແລະ ໃສ່ໃຫ້ຖືກຕ້ອງ, ລ້າງມືໃຫ້ສະອາດກ່ອນ ແລະ ຫຼັງທີ່ຮູ້ສຶກໄດ້ສຳຜັດມັນ, ການໃສ່ຕ້ອງຮັບປະກັນປົກປິດດັງ-ປາກ ລົງຮອດຫຸ້ມຄາງ ແລະ ຖີ້ມຫຼັງໃຊ້ແລ້ວໂດຍໃສ່ຖົງແລະໝັດໃຫ້ແໜ້ນກ່ອນຈະຖີ້ມລົງຖັງຂີ້ເຫຍື້ອ.

3. ຮັກສາໄລຍະຫ່າງຢ່າງໜ້ອຍ 1 ແມັດ ແລະ ວິທີນີ້ພວກເຮົາຮູ້ແລ້ວວ່າລະອອງທີ່ຕິດເຊື້ອບໍ່ສາມາດຟຸ້ງກະຈາຍເກີນໄລຍະນີ້ໄດ້.

4. ໃຊ້ຜ້າແພມົນ ຫຼື ກະດາດອະນາໄມ ອັດປາກ-ດັງ ຫຼື ໃຊ້ແຂນສອກປິກໃນເວລາຈາມ ເພື່ອບໍ່ໃຫ້ລະອອງຈາມຟົ້ງໄດ້ໄກໃສ່ຜູ້ອ້ອມຂ້າງ.

5. ການໝັ່ນລ້າງມືບ່ວ່າດ້ວຍສະບູ ແລະ ຫຼື ດ້ວຍເຈວທີ່ມີທາດເຫຼົ້າຍັງໄດ້ຜົນດີທີ່ສຸດ.

6. ຫລີກລ້ຽງຢູ່ ຫຼື ພົບຜູ້ຄົນໃນສະຖານທີ່ປິດເຊັ່ນ: ຫ້ອງເປີດແອ, ຄວນພາໄປກັນຂ້າງນອກ ຫຼືເປີດປະຕູປ່ອງຢ້ຽມ ແລະ ເດັດຂາດຫຼີກລ້ຽງສະຖານທີ່ບໍ່ສາມາດຮັກສາໄລຍະຫ່າງໄດ້ ຫຼື ມີຄົນຢູ່ແອອັດ ຫຼື ຫຼາຍ ຖ້າພວກເຮົາຫາກມີສະຕິຢູ່ຕະຫຼອດ ໃນການປ້ອງກັນຕົນເອງຂ້າພະເຈົ້າເຊື່ອໝັ້ນວ່າພວກເຮົາຈະຜ່ານວັນວົ່ງທ້າຍປີເກົ່າຕ້ອນຮັບປີໃໝ່ ຫຼື ເທດສະການທາງສາດສະໜາໄດ້ຢ່າງປອດໄພ ແລະ ຈະບໍ່ເຫັນຕົວເລກຫຼັງປີໃໝ່ເພີ່ມຂື້ນຈົນໜ້າຕົກໃຈ.

ດັ່ງນັ້ນ, ເມື່ອທ່ານຫາກຮູ້ສຶກບໍ່ສະບາຍແມ່ນໄປຫາແພດ ແລະ ກັກໂຕກ່ອນ 14 ວັນ ແມ່ນວິທີທີ່ທ່ານສາມາດຊ່ວຍຄອບຄົວ ແລະ ສັງຄົມກໍ່ຄື ປະເທດຊາດໃນການມີສ່ວນຮ່ວມຢຸດຢັ້ງການແຜ່ເຊື້ອ ກໍ່ຄືການລະບາດໃນຄັ້ງນີ້ຮ່ວມກັນກັບເຈົ້າໜ້າທີ່.

Related Posts

Leave a Reply

Your email address will not be published.