ເຢຍລະມັນ ສະໜອງທຶນ 7,25 ລ້ານເອີໂຣ ຊ່ວຍພັດທະນາອາຊີວະສຶກສາໃນລາວ

ເຢຍລະມັນ ສະໜອງທຶນ 7,25 ລ້ານເອີໂຣ ຊ່ວຍພັດທະນາອາຊີວະສຶກສາໃນລາວ

ຂປລ. ເມື່ອບໍດົນມານີ້, ໄດ້ມີພິທີລົງນາມສັນຍາ ການສືບຕໍ່ຈັດຕັ້ງປະຕິບັດໂຄງການພັດທະນາອາຊີວະສຶກສາ ໃນ ສປປ ລາວ (VELA) ໄລຍະ 2 ແຕ່ປີ 2019-2023, ໂດຍການສະໜັບສະໜູນຊ່ວຍເຫລືອທຶນ ຈາກລັດຖະບານເຢຍລະມັນ ໃນມູນຄ່າ 7,25 ລ້ານເອີໂຣ ລະຫວ່າງ ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ,

ທ່ານ ນາງ ບາບາຣາ ສວາຍເກີ (Barbara Schweiger) ຮອງອໍານວຍການ ອົງການ GIZ ປະຈໍາລາວ ແລະ ທ່ານ ນາງ ໂດໂຣເທຍ ຄອບພາດ (Dorothea Coppard) ຫົວໜ້າໂຄງການ VELA ກະຊວງການຮ່ວມມືດ້ານເສດຖະກິດ ແລະ ການພັດທະນາ (BMZ) ປະເທດເຢຍລະມັນ.

ພາຍຫລັງໄດ້ຈັດຕັ້ງປະຕິບັດໂຄງການ VELA ໄລຍະ 2 ແຕ່ປີ 2019 ເປັນຕົ້ນມາ, ໂຄງ ການໄດ້ສະໜູນສະໜູນ ວິທະຍາໄລເຕັກນິກວິຊາຊີບ 4 ແຫ່ງ ແລະ ສະຖານປະກອບການຫລາຍກວ່າ 100 ເເຫ່ງ ຢູ່ນະຄອນຫລວງວຽງຈັນ, ແຂວງຫລວງພະບາງ, ແຂວງວຽງຈັນ ແລະ ແຂວງຈໍາປາສັກ ໂດຍການພັດທະນາ ແລະ ນໍາສະເໜີຫລັກສູດ ການຮຽນ-ການສອນອາຊີວະສຶກສາ ແບບຄວບຄູ່ (ອສຄ) ໃນ 14 ສາຂາ ແລະ ມີນັກຮຽນຫລາຍກວ່າ 1.200 ຄົນ ໄດ້ເຂົ້າຮຽນແບບຄວບຄູ່, ເຊິ່ງນັກ ຮຽນສ່ວນຫລາຍ ກໍແມ່ນໄດ້ມີວຽກເຮັດງານທໍາ ພາຍຫລັງຮຽນຈົບ.

ອສຄ ແຕກຕ່າງຈາກວິທີການຮຽນ-ການສອນແບບດັ້ງເດີມ, ທີ່ເນັ້ນໃສ່ການຮຽນ-ການສອນ ຢູ່ໃນໂຮງຮຽນເປັນຫລັກ. ລະບົບ ອສຄ ໄດ້ເຊື່ອມໂຍງການຮຽນ-ການສອນ ດ້ານທິດສະດີຢູ່ໃນໂຮງຮຽນ ໄປຄວບຄູ່ກັບການຝຶກປະຕິບັດເຮັດວຽກຕົວຈິງຫລາຍກວ່າ 50% ຢູ່ສະຖານປະກອບການຄູ່ຮ່ວມງານຕ່າງໆ ທີ່ນັກຮຽນຖືກສົ່ງໄປຮຽນຮູ້ ແລະ ປະຕິບັດຕົວຈິງ, ຊຶ່ງວິທີການນີ້ຊ່ວຍໃຫ້ຜູ້ທີ່ຮຽນຈົບ ມີທັກສະທີ່ຈໍາເປັນສໍາລັບການເຮັດວຽກ ຢູ່ສະຖານປະກອບການ.

ໃນຂະນະດຽວກັນ, ສະຖານປະກອບການ ກໍໄດ້ມີກໍາລັງແຮງງານ ທີ່ໄດ້ຜ່ານການຝຶກທີ່ດີກວ່າ.ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ກ່າວວ່າ: ໂຄງການ VELA ໄດ້ຊ່ວຍສ້າງຊັບພະຍາກອນມະນຸດທີ່ມີທັກສະຫລາຍດ້ານ ເພື່ອຕອບສະໜອງຄວາມຕ້ອງການຂອງຕະຫລາດແຮງງານໃນ ສປປ ລາວ.

ນອກນີ້, ບັນດາວິທະຍາໄລ ທີ່ເປັນຄູ່ຮ່ວມໃນໂຄງການ ກໍເປັນຕົວແບບທີ່ດີໃຫ້ແກ່ໂຮງຮຽນອາຊີວະແຫ່ງຕ່າງໆໃນທົ່ວປະເທດ ແລະ ການສືບຕໍ່ສະໜັບສະໜູນທຶນຂອງລັດຖະບານເຢຍລະມັນ ໃນໂຄງການນີ້, ຈະຊ່ວຍພວກເຮົາ ນໍາໃຊ້ວິທີການຮຽນ-ການສອນທີ່ມີປະສິດທິພາບ ເພື່ອການປັບປຸງ ແລະ ຝຶກອົບຮົມ ໃຫ້ແກ່ຄູອາຊີວະສຶກສາ ໃນຂອບເຂດໄດ້ດີຂຶ້ນ ແລະ ມີຄວາມຍືນຍົງ.

ພາບ: 789

Related Posts

Leave a Reply

Your email address will not be published.