ໂສມໜ້າສາມບ່າວທີ່ເຮັດໃຫ້ອຸໂມງທາງດ່ວນວຽງຈັນວັງວຽງມືດ

ຈັບໄດ້ແລ້ວຄົນລັກຕັດສາຍໄຟຟ້າ ຢູ່ອຸມົງ ທາງດ່ວນ.

ໃນວັນທີ 21 ມີຖຸນາ 2021 ຜ່ານມານີ້ເຈົ້າໜ້າທີ່ຕໍາຫຼວດໝ່ວຍງານຄະດີອາຍາ – ເສດຖະກິດ ກອງບັນຊາການ ປກສ ເມືອງໂພນໂຮງ ແຂວງວຽງຈັນ ໄດ້ຮັບແຈ້ງຈາກບໍລິສັດທາງດ່ວນ ວ່າມີຄົນບໍ່ດີມາເຄື່ອນໄຫວລັກຕັດສາຍໄຟຟ້າຈຸດອຸມົງທາງດ່ວນ ຈາກນັ້ນເຈົ້າໜ້າທີ່ຕຳຫຼວດຈື່ງໄດ້ລົງກວດກາສະຖານທີ່ຕົວຈິງ ຕິດຕາມຫາກຸ່ມເປົ້າໝາຍໃນຂອບເຂດເທດສະບານເມືອງໂພນໂຮງຈື່ງສາມາດກັກຕົວເປົ້າໝາຍໄດ້ 3 ຄົນຄື:

ທ້າວ ລໍາພົງ ອາຍຸ 20 ປີ ອາຊີບກໍາມະກອນ, ທ້າວ ຕີໃຫຍ່ ອາຍຸ 20 ປີ ອາຊີບກຳມະກອນ ທັງສອງແມ່ນຢູ່ບ້ານແສນຊຸມ ເມືອງໂພນໂຮງ ແຂວງວຽງຈັນ ແລະ ທ້າວ ອີນທະສອນ ອາຍຸ 44 ປີ ອາຊີບກໍາມະກອນ ປະຊາຊົນບ້ານຄໍາຮຸ່ງ ເມືອງໄຊທານີ ນະຄອນຫຼວຽງຈັນ ມາທໍາການສຶບສວນ-ສອບສວນ.

ຜ່ານການສຶບສວນ-ສອຍສວນຂອງເຈົ້າໜ້າທີ່ຕໍາຫຼວດໝ່ວຍງານຄະດີອາຍາ – ເສດຖະກິດ ກອງບັນຊາການ ປກສ ເມືອງໂພນໂຮງ ທ້າວ ລໍາພົງ ໄດ້ໃຫ້ການຮັບສາລະພາບວ່າ ເບື້ອງຕົ້ນໃນວັນທີ່ 20 ມີຖຸນາ 2021 ໄດ້ຮ່ວມກັບໝູ່ພາຍໃນບ້ານດຽວກັນ ໄດ້ຊວນກັນໄປລັກຕັດເອົາສາຍໄຟຟ້າຢູ່ທາງດ່ວນ ອຸມົງ ທີ່ຕັ້ງຢູ່ເຂດບ້ານແສນຊຸມ ເມືອງໂພນໂຮງ ໂດຍກະກຽມອຸປະກອນໄປນໍາມີ ມີດ 1 ດວງ, ຄີມຕັດເຫຼັກ 1 ອັນ ແລະ ຫົວໂຄມ 2 ຫົວ, ພໍເດີນທາງໄປຮອດສະຖານທີ່ດັ່ງກ່າວ ໄດ້ໄປຕັດເອົາສາຍໄຟຟ້າມີຄວາມຍາວ 1 ແມັດ ມີນໍ້າໜັກ 2 ກິໂລ ແລ້ວກໍ່ເອົາໄປຂາຍຢູ່ຮ້ານຊື້ ຂາຍເຫຼັກເສດໄດ້ເງິນ 100,000 ກີບ ຫຼັງຈາກໄດ້ເງີນຈື່ງແບ່ງກັນເອົາໄປຫຼີ້ນເກມ ແລະ ຊື່ກີນຈົນໜົດ,

ຜູ້ກ່ຽວຍັງໃຫ້ການຕື່ມອີກວ່າ ຄັ້ງທີ່ 1 ແມ່ນໄດ້ຮ່ວມກັບໝູ່ພາກັນໄປລັກສາຍໄຟຢູ່ຕໍ່ໜ້າທາງເຂົ້າອຸມົງ ຢູ່ເຂດບ້ານແສນຊຸມ ໄດ້ສາຍໄຟປະມານ 1 ກິໂລ ,

ຄັ້ງທີ່ 2 ຜູ້ກ່ຽວໄດ້ຮ່ວມກັບໝູ່ໄປລັກເອົາສາຍໄຟຢູ່ຫຼັກສະຖານນີໂທລະສັບ ໄດ້ສາຍໄຟຟ້ານໍ້າໜັກ 5 ກິໂລ ຂາຍໄດ້ເງີນ 250,000 ກີບ,

ຄັ້ງທີ່ 3 ໃນເດືອນ ມີຖຸນາ 2021 ຜູ້ກ່ຽວໄດ້ຮ່ວມກັບໝູ່ໄປລັກຕັດເອົາສາຍໄຟຢູ່ທາງອຸມົງ ບ້ານຫ້ວຍຫີນລັບ ໄດ້ສາຍໄຟປະມານ 2 ກິໂລ ຂາຍໄດ້ເງີນ 100,000 ກີບ,

ຄັ້ງທີ່ 4 ຜູ້ກ່ຽວໄດ້ ກັບ ທ້າວ ຕີໃຫຍ່ ໄປລັກສາຍໄຟຢູ່ທາງດ່ວນ 1 ຄັ້ງ ໃຊ້ອຸປະກອນມີ ມິດ, ພ້າ ແລະ ຄີມ ລັກຕັດຢູ່ຕໍ່ໜ້າທາງເຂົ້າອຸມົງຂອບເຂດບ້ານຫ້ວຍຫີນລັບ ເມືອງຫີນເຫີບ ໄດ້ສາຍໄຟທັງໜົດ 5 ກິໂລ ຂາຍໃນລາຄາກິໂລລະ 50,000 ກີບ ໄດ້ເງີນ 250,000 ກີບ ແຕ່ລະຄັ້ງທີ່ເອົາສາຍໄຟໄປຂາຍນັ້ນເງິນແມ່ນແບ່ງປັນກັນຈ່າຍຈົນໜົດ.

ທ້າວ ຕີໃຫຍ່ ໃຫ້ການຮັບສາລະພາບວ່າ ໄດ້ຮ່ວມກັບ ທ້າວ ລໍາພົງ ໄປລັກເອົາສາຍໄຟຢູ່ອູມົງທາງດ່ວນ 2 ຄັ້ງ , ຄັ້ງທີ່ 1 ໃນເດືອນພຶດສະພາ 2021 ພວກກ່ຽວໄດ້ພາກັນໄປລັກສາຍໄຟຢູ່ອຸມົງທາງດ່ວນ ໄດ້ສາຍໄຟໃຫຍ່ປະມານ 2 ແມັດ ນໍ້າໜັກ 5 ກິໂລ ຫຼັງຈາກນັ້ນກໍ່ພາກັນເອົາໄປປອກຂາຍ ຂາຍກິໂລ 50,000 ກີບ ຂາຍໄດ້ເງິນ 250,000 ກີບ, ຄັ້ງທີ່ 2 ເຊີ່ງໃນວັນດຽວກັນນັ້ນ ພວກກ່ຽວກໍ່ພາກັນໄປລັກຕັກເອົາສາຍໄຟຢູ່ທາງດ່ວນອີກ ໄດ້ສາຍໄຟນໍ້ໜັກ 5 ກິໂລ ຈາກນັ້ນກໍ່ເອົາໄປຂາຍໄດ້ເງີນ 250,000 ກີບ ແຕ່ລະຄັ້ງທີ່ເອົາສາຍໄຟໄປຂາຍນັ້ນເງິນແມ່ນແບ່ງປັນກັນຈ່າຍຈົນໜົດ.

ທ້າວ ອີນທະສອນ ໄດ້ໃຫ້ການຮັບສາລະພາບຕໍ່ເຈົ້າໜ້າທີ່ວ່າ ຜູ້ກ່ຽວໄດ້ເຄື່ອນໄຫວລັກສາຍໄຟຢູ້ອຸມົງທາງດ່ວນ ໃນເດືອນພຶດສະພາ 2021 ຜູ້ກ່ຽວໄດ້ອອກຈາກບ່ອນພັກເຊົາບ້ານແສນຊຸມ ເມືອງໂພນໂຮງ ແລ້ວຍ່າງເຂົ້າໄປໃນອຸມົງໄລຍະ 30 ແມັດ ຜູ້ກ່ຽວຊອກດຶງເອົາສາຍໄຟຟ້າຢູ່ກ້ອງອຸມົງທາງດ່ວນ ໄດ້ສາຍໄຟຟ້າເສັ້ນຜ່າໃຈກາງປະມານ 2 ຊັງຕີ ຍາວ 16 ແມັດ ພາຍຫຼັງລັກໄດ້ແລ້ວ ຜູ້ກ່ຽວກໍ່ເອົາໄປປອກໄດ້ນໍ້າໜັກປະມານ 7 ກິໂລ ຈາກນັ້ນຜູ້ກ່ຽວກໍ່ເອົາໄປຂາຍໄດ້ເງິນ 200,000 ກີບ ສ່ວນເງິນແມ່ນໄດ້ເອົາໄປໃຊ້ຈ່າຍຈົນໜົດ.

ແລະ ຍັງໃຫ້ການຕື່ມອີກວ່າ ໄດ້ເຄື່ອນໄຫວລັກຊັບຂອງບໍລິສັດທາງດ່ວນ 2 ຄັ້ງ, ຄັ້ງທີ່ 1 ໃນເດືອນ ພຶດສະພາ 2021 ຜູ້ກ່ຽວໄດ້ໄປລັກເອົາຫຼັກໜາມໜາກຈັບຂອງບໍລິສັດຈຳນວນ 2 ໂຄ້ງ ຢູ່ບ້ານແສນຊຸມ ເມືອງໂພນໂຮງ ແລ້ວກໍ່ເອົາໄປຂາຍໂຄ້ງລະ 25,000 ກີບ ໄດ້ເງີນ 50,000 ກີບ, ຄັ້ງທີ່ 2 ໃນວັນທີ 18 ກໍລະກົດ 2021 ຜູ້ກ່ຽວໄດ້ໄປລັກເອົາຜ້າບັດສີສົ້ມຂອງບໍລິສັດດັ່ງກ່າວ ໄດ້2 ຜືນ ຫຼັງຈາກລັກໄດ້ແລ້ວກໍ່ເອົາໄປຂາຍໃນລາຄາຜືນລະ 100,000 ກີບ ໄດ້ເງີນ 200,000 ກີບ ສ່ວນເງີນແມ່ນເອົາໄປໃຊ້ຈ່າຍຈົນໜົດ, ເຊີ່ງຜົນເສຍຫາຍຕາມການປະເມີນຂອງບໍລິສັດທາງດ່ວນແມ່ນມີຄວາມເສຍຫາຍເປັນຈໍານວນເງີນ 380,000 ໂດລາສະຫາລັດ.

ຜ່ານການສຶບສວນ-ສອບສວນ ຂອງເຈົ້າໜ້າທີ່ຕໍາຫຼວດວິຊາສະເພາະຄະດີອາຍາ-ເສດຖະກິດ ກອງບັນຊາການ ປກສ ເມືອງໂພນໂຮງ ວ່າ: ທ້າວ ລຳພົງ, ທ້າວ ຕີໃຫຍ່ ແລະ ທ້າວ ອີນທະສອນ ແມ່ນເຈດຕະນາໃນການລັກຊັບ ປະເພດສາຍໄຟຢູ່ອຸມົງທາງດ່ວນຢ່າງແທ້ຈີງ ເຊີ່ງການກະທຳດັ່ງກ່າວນັ້ນໄດ້ສ້າງຄວາມເສຍຫາຍໃຫ້ແກ່ຊັບສີນຂອງລັດ ແລະ ເຮັດໃຫ້ສັງຄົມບໍ່ມີຄວາມລະບຽບຮຽບຮ້ອຍ ຜິດຕໍ່ກົດໝາຍອາຍາສະບັບປັບປຸງປີ 2017ມາດຕາ 231 ໃນສະຖານການລັກຊັບ.

ພາບ – ຂ່າວ ປກສ ແຂວງວຽງຈັນ: ຈັນດາລາ

Related Posts

Leave a Reply

Your email address will not be published. Required fields are marked *