2 ປະທານປະເທດ ລາວ-ຫວຽດນາມ ຮ່ວມມອບ-ຮັບ ຫໍສະພາແຫ່ງຊາດລາວ ຫຼັງໃໝ່ ຢ່າງເປັນທາງການ

ໃນທີ່ສຸດກໍ່ສຳເລັດພາຍຫຼັງ ທີ່ໄດ້ເລີ່ມລົງມືກໍ່ສ້າງມາແຕ່ທ້າຍປີ 2017 ມາຮອດປະຈຸບັນ ໂຄງການກໍ່ສ້າງຫໍສະພາແຫ່ງຊາດຫຼັງໃໝ່ ທີ່ມີມູນຄ່າການກໍ່ສ້າງ 800 ຕື້ກີບ ແມ່ນສຳເລັດແລ້ວ 100% ກ່ອນໜ້ານີ້ເມື່ອວັນທີ 11 ມີນາ 2021 ສະພາແຫ່ງຊາດ ໄດ້ຈັດພິທີທາງສາສະໜາ ຂຶ້ນຫໍສະພາແຫ່ງຊາດຫຼັງໃໝ່.

ເຊິ່ງຫໍສະພາແຫ່ງຊາດ ຫຼັງໃໝ່ນີ້ ແມ່ນຕັ້ງຢູ່ຈຸດເກົ່າຫໍສະພາແຫ່ງຊາດ ເຊິ່ງຫໍສະພາແຫ່ງຊາດຫຼັງໃໝ່ນີ້ ແມ່ນໄດ້ວາງສີລາລຶກກໍ່ສ້າງ ໃນວັນທີ 1 ພະຈິກ 2017 ຜ່ານມາ ໃນມູນຄ່າການກໍ່ສ້າງທັງໝົດ 100 ລ້ານໂດລາສະຫະລັດ ຫຼື ປະມານ 800 ຕື້ກີບ ເຊິ່ງເປັນທຶນຊ່ວຍເຫຼືອລ້າຈາກພັກ-ລັດ ແລະ ປະຊາຊົນ ສສ ຫວຽດນາມ.

ໂດຍໄດ້ອອກແບບເປັນອາຄານ 5 ຊັ້ນ, ສູງ 34,6 ແມັດ, ມີເນື້ອທີ່ອາຄານປຸກສ້າງທີ່ຕິດກັບໜ້າດິນ 7.171 ຕາແມັດ; ມີຫ້ອງປະຊຸມ, ຫ້ອງເຮັດວຽກ, ຫ້ອງບໍລິຫານ, ບໍລິການຮັບໃຊ້ ແລະ ລະບົບຄວາມປອດໄພທີ່ໄດ້ມາດຕະຖານ, ໃນນັ້ນ ທັງໝົດອາຄານ ສາມາດບັນຈຸໄດ້ 800-1.000 ຄົນ, ສະເພາະຫ້ອງປະຊຸມສະພາແຫ່ງຊາດ ສາມາດບັນຈຸໄດ້ 433 ຄົນ. ອາຄານຖືກອອກແບບສວຍງາມທີ່ມີຄວາມສວຍງາມ, ມີລວດລາຍ-ດວງດອກ ທີ່ເປັນເອກະລັກ ທາງດ້ານສິລະປະວັດທະນະທຳຂອງລາວ ປະສົມປະສານກັບຄວາມທັນສະໄໝ ຂອງຍຸກສະໄໝ; ເປັນເອກະລັກສະເພາະ ຂອງສະພາແຫ່ງຊາດ, ມີຄວາມແຕກຕ່າງກັບຕຶກອາຄານສຳນັກງານອື່ນໆ.

ຫຼ້າສຸດ ເນື່ອງໃນໂອກາດທີ່ປະທານປະເທດ ສສ ຫວຽດນາມ ພ້ອມຄະນະ ໄດ້ເດີນທາງມາຢ້ຽມຢາມ ສປປ ລາວ ໃນວັນທີ 9-10 ສິງຫາ 2021 ດັ່ງນັ້ນ ມາຮອດວັນທີ 10 ສິງຫາ 2021 ກໍ່ໄດ້ມີພິທີມອບ-ຮັບ ສະພາແຫ່ງຊາດລາວ ຫຼັງໃໝ່ຂຶ້ນ ໂດຍມີ ສະຫາຍ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ແລະ ສະຫາຍ ຫງວຽນ ຊວນ ຟຸກ ປະທານປະເທດ ແຫ່ງ ສສ ຫວຽດນາມ ເຂົ້າຮ່ວມເປີດແຖບຜ້າ ຫີນສີລາລຶກ ພິທີມອບ-ຮັບ ຫໍສະພາແຫ່ງຊາດລາວຫຼັງໃໝ່ ພ້ອມມີບັນດາການນຳ 2 ຝ່າຍເຂົ້າຮ່ວມເປັນສັກຂີພິຍານ, ເຊິ່ງສະພາແຫ່ງຊາດຫຼັງໃໝ່ນີ້ແມ່ນເປັນຂອງຂວັນຈາກ ພັກ, ລັດ ແລະ ປະຊາຊົນຫວຽດນາມ ໃຫ້ແກ່ ສປປ ລາວ.

Northern Times News

Related Posts

Leave a Reply

Your email address will not be published. Required fields are marked *