ຈັງຫວັດອຸບົນຣາຊະທານີ ມອບເຄື່ອງຊ່ວຍທລາວ ມູນຄ່າລວມ 266 ລ້ານກີບ !

ຈັງຫວັດອຸບົນຣາຊະທານີ ຣາຊະອານາຈັກໄທ ມອບເຄື່ອງຊ່ວຍເຫຼືອໃຫ້ສອງແຂວງຂອງລາວຄື:ແຂວງສາລະວັນ ແລະ ຈຳປາສັກ ມູນຄ່າ 7 ແສນ 6 ໝື່ນກວ່າບາດ ຫຼື ເທົ່າກັບ 266 ລ້ານກີບ, ເພື່ອໄປນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຊຶ່ງປະກອບມີ ເຄື່ອງວັດແທກຄວາມດັນເລືອດແບບດີຈີຕອນ, ເຄື່ອງກະຕຸ້ນຫົວໃຈໄຟຟ້າແບບອັດຕະໂນມັດ, ເຄື່ອງຜະລິດອົກຊີແຊນດ້ວຍໄຟຟ້າ, ເຄື່ອງວັດແທກອຸນຫະພູມແບບດີຈີຕອນ (ແບບທຳມະດາ ແລະ ແບບມີຂາຕັ້ງ), ບາຫຼອດວັດແທກອຸນຫະພູມແບບດີຈີຕອນ, ເຄື່ອງວັດແທກອົກຊີແຊນໜີບມືຜູ້ໃຫຍ່ ແລະ ເດັກ ນ້ອຍ, ຊຸດພີພີອີ, ຊຸດກັນເປື້ອນ, ໜ້າກາກ N95, ໜ້າກາກອະນາໄມ ລວມມູນຄ່າ 767.300 ບາດ ຫຼື ປະມານ 253 ລ້ານກວ່າກີບ.

ພິທີມອບ-ຮັບ ໄດ້ຈັດຂຶ້ນເມື່ອບໍ່ດົນມານີ້ ທີ່ດ່ານສາກົນວັງເຕົ່າ-ຊ່ອງເມັກ ມອບໂດຍ ທ່ານ ສຸຣິຍາ ບຸດຈິນດາ ຫົວໜ້າສຳນັກງານຈັງຫວັດອຸບົນຣາຊະທານີ ຣາຊະອານາຈັກໄທ ຮັບໂດຍທ່ານ ຄຳຄ້າຍ ຄຳສິງສະຫວັດ ຮອງຫົວໜ້າພະແນກສາທາລະນະສຸກແຂວງສາລະວັນ, ທ່ານ ສຽງສີ ສຸພັກດີ ຫົວໜ້າພະແນກສາທາລະນະສຸກແຂວງຈຳປາສັກ ພ້ອມດ້ວຍພາກສ່ວນກ່ຽວຂອງເຂົ້າຮ່ວມ.

ການຊ່ວຍເຫຼືອລາວຄັ້ງນີ້ເປັນການສະແດງເຖິງນໍ້າໃຈດີງາມ ແລະ ເສີມສ້າງຄວາມສາມັກຄີການພົວພັນຮ່ວມມື, ມູນເຊື້ອສາຍພົວພັນການທູດລະຫວ່າງ ສປປ ລາວ ແລະ ຣາຊະອານາຈັກໄທ ຄົບຮອບ 70 ປີ ໃຫ້ໜັກແໜ້ນ ເພີ່ມພູນຄູນສ້າງຍິ່ງໆຂຶ້ນ.

(ຂ່າວ-ພາບ: ກິນດາວັນ ອ້ວນນາຄູ)

Related Posts

Leave a Reply

Your email address will not be published. Required fields are marked *