ນ້ອຍໃຈເມຍ

ຜົວປີນຂຶ້ນຫຼັກເສົາສັນຍານ ນ້ອຍໃຈເມຍບໍ່ພາໄປຕະຫຼາດວັນທີ 12 ກັນຍາ ເວັບໄຊ້ Ch3plus ລາຍງານວ່າ ເວລາ 20:00 ຂອງວັນທີ 12 ກັນຍາ ທີ່ຜ່ານມາ ໜ່ວຍກູ້ໄພຢູ່ທີ່ ເມືອງພັດທະຍາ ແຂວງຊົນບູລີ ປະເທດໄທ ໄດ້ຮັບແຈ້ງເຫດມີຄົນປີນຂຶ້ນໄປເທິງຫຼັກເສົາສັນຍານ ເຊິ່ງແມ່ນ ທ້າວ ສະຫຼອງ ພົມເສນ ອາຍຸ 53 ປີ

ໄດ້ປີນຂຶ້ນໄປເກືອບຮອດຍອດເສົາ ເຈົ້າໜ້າທີ່ ແລະ ຊາວບ້ານພະຍາຍາມໂອ້ລົມ ແຕ່ກໍບໍ່ເປັນຜົນ ຈົນເຈົ້າໜ້າທີ່ໄດ້ປີນຂຶ້ນໄປເຈລະຈາ, ແຕ່ດ້ວຍຄວາມເມົາເຫຼົ້າ ປະກອບກັບມີອາຍຸຫຼາຍ ຈຶ່ງບໍ່ສາມາດລົງມາເອງໄດ້, ເຈົ້າໜ້າທີ່ຕ້ອງໃຊ້ເຊືອກມັດເອົາໂຕຂອງ ທ້າວ ສະຫຼອງ ແລະ ລົງມາພ້ອມກັນດ້ວຍຄວາມປອດໄພ ໂດຍເຈົ້າໜ້າທີ່ກູ້ໄພ ໄດ້ກວດເບິ່ງອາການເບື້ອງຕົ້ນ ກ່ອນເຄື່ອນຍ້າຍໄປໂຮງໝໍຢ່າງເລັ່ງດ່ວນ.

ສອບຖາມ ທ້າວ ສະຫຼອງ ພົມເສນ ໄດ້ຮູ້ວ່າ ຕົນເອງມີອາຊີບພໍ່ຄ້າອາຫານຕາມສັ່ງ ກ່ອນເກີດເຫດໄດ້ຊັກຊວນໃຫ້ເມຍພາໄປຕະຫຼາດ ແຕ່ຜູ້ເປັນເມຍບໍ່ໄດ້ພາໄປ ເຮັດໃຫ້ເກີດອາການນ້ອຍໃຈ ປະກອບກັບຕົນເອງດື່ມເຫຼົ້າເຂົ້າໄປນໍາ ເມື່ອແນມເຫັນເສົາໄຟຟ້າທີ່ຢູ່ໃກ້ບ້ານ ຈຶ່ງປີນຂຶ້ນໄປແຕ່ກໍໝົດແຮງລົງມາບໍ່ໄດ້ ຈົນເຮັດໃຫ້ມີຄົນໂທແຈ້ງເຈົ້າໜ້າທີ່ມາຊ່ວຍເຫຼືອຄືດັ່ງກ່າວ.

ທີ່ມາ: ລາວໂພສ

Related Posts

Leave a Reply

Your email address will not be published. Required fields are marked *